Lekaj: Nuk e pranojmë rezultatin e matjes së territorit

Shefi i Grupit Parlamentar të AAK, Pal Lekaj, ka thënë se se komisioni për matjen e territorit të vendit i formuar nga Qeveria e Kosovës, është i përbërë nga ata të cilët e kanë mbrojtur versionin aktual të demarkacionit.

“Si mundët opozita dhe qytetarët t’i besojnë Hivzi Islamit dhe Tomor Qelës të cilët hapur e kanë mbrojtur versionin aktual të demarkacionit.  Prandaj, vlerësoj se ky komision është vetëm mbulesë për Qeverinë e koalicionit për t’i shantazhuar deputetët e Kuvendit për ta votuar demarkacionin”, ka shkruar Lekaj në Facebook.

Sipas tij, partitë opozitare dhe kryetari i Komunës se Deçanit dhe Junikut kanë refuzuar të jenë pjesë e këtij cirku.

“Pasi nuk mund të jemi pjesë e një komisioni, i cili do të matë territorin e vendit për sa kohë qe kufijtë e vendit mbesin të padefinuar. Se nuk mund të matet territori i vendit pa u definuar kufijtë e kanë thënë edhe ekspertet e gjeodezisë, madje edhe deputetë të koalicionit”, ka theksuar Lekaj.

Grupi Parlamentar i Aleancës për Ardhmërinë e Kosovës, do të vazhdojë bashkë me partitë opozitare qe të kundërshtojnë këtë marrëveshje, e cila i humbet vendit mbi 8 mijë hektarë.

“I bëj thirrje Qeverisë qe të ndalë përpjekjet e tyre për të kaluar këtë marrëveshje pasi ajo nuk do të kalojë. Qeveria duhet qe ta anuloj në tërësi këtë marrëveshje dhe të shkarkoj Komisionin Shtetëror i cili ka bërë demarkimin e kufirit me Malin e Zi, dhe pastaj Qeveria e ardhshme, e cila do të formohet si rezultat i vullnetit të popullit ta negocioj me Malin e Zi demarkimin e kufirit”, shprehet Lekaj.

Tutje ai ka thënë se thirrjet e Thaçit dhe Mustafës se kalimi i demarkacionit e bën të mundshëm liberalizimin e vizave janë të pavërteta, sepse e kanë thënë edhe zyrtarët e lartë të Bashkimit Evropian se Kosova nuk do të marrë liberalizimin e vizave për sa kohë qe nuk luftohet krimi dhe korrupsioni i organizuar, i cili po lulëzon çdo ditë e më shumë./BS/
Njofton  “Bota Sot”

Be the first to comment

Leave a Reply